2021 ވަނަ އަހަރުގެ މަސްވެރިންގެ ދުވަސް މިރަށުގައި ފާހަގަ ކުރުމަށްޓަކައި ބޭއްވި ރަސްމިއްޔާތު.

ހުވަދުއަތޮޅު އުތުރުބުރީ މާމެންދޫ ކައުންސިލްގެ ފަރާތުން 2021 ވަނަ އަހަރުގެ މަސްވެރިންގެ ދުވަސް  މިރަށުގައި ކުލަގަދަކޮށް ފާހަގަ ކުރުމަށްޓަކައި ބޭއްވި ރަސްމިއްޔާތަށް ތައްޔާރު ކުރުމުގެ މަސައްކަތުގައި ރަށުގެ އެންމެހާ މުއައްސަސާތަކާއި، ބައެއް ޖަމްޢިއްޔާތަކާއި، އަދި ޕީ.ޓީ.އޭގެ ފަރާތުން ވަނީ ވަރަށްބޮޑު އެހީތެރިކަމަކާ އެއްބާރުލުމެއް ލިބިފައެވެ. މި ރަސްމިއްޔާތު ބޭއްވިފައިވަނީ 09 ޑިސެންބަރ 2021 ވަނަ ދުވަހުގެރޭ 8:30 ގައި ރަށުގެ އަތިރިމަތީގައެވެ. އަދި މި ރަސްމިއްޔާތުގައި ވަނީ ރަށުގެ ދުވަސްވީ މަސްވެރިންނަށް އެ ފަރާތްތަކުގެ ޚިދުމަތުގެ އަގު ވަޒަންކޮށް ކައުންސިލްގެ ފަރާތުން ދޭ ޝަރަފުވެރިކަމުގެ ހަނދާނީ ލިއުން ދީފައެވެ. އަދި މި ރަސްމިއްޔާތު ނިމިގެންދިޔައީ ކައުންސިލުން މަސްވެރިންނަށް ދެވުނު ޚާއްސަ ޖާފަތަކުންނެވެ.

އަދި 10 ޑިސެންބަރ 2021 ވަނަ ދުވަހު ހަވީރު މަސްވެރިންގެ ޓީމަކާ ރަށުގެ މުއައްސަސާތަކުން ހޮވާލެވުނު ޓީމަކާ ދެމެދު ކުޅެވުނު ފޯރިގަދަ ފުޓްބޯޅަ މެޗެއްވެސްވަނީ ބޭއްވިފައެވެ. މި މެޗު 3-2 ލަޑުން ކާމިޔާބު ކޮށްފައިވަނީ މަސްވެރިންގެ ފުޓްބޯޅަ ޓީމުންނެވެ.