ކައުންސިލްގެ ފަރާތުން ގޭބިސީތަކުގައި އުފެދޭ ކުނި މެނޭޖްކުރަން ފެށުން

މިރަށަށް ދިމާވެފައިވާ ކުނީގެ މައްސަލަ ހައްލުކޮށް މި ރަށަކީ ސާފުތާހިރު އަދި ސިއްޙީގޮތުން ދުޅަހެޔޮ މުޖްތަމައެއް ދިރިއުޅޭ ރަށަކަށް ހެދުމަށްޓަކައި ރަށުގެ ގޭބިސީތަކުގައި ދުވަހުން ދުވަހަށް އުފެދޭކުނި ނައްތަލުމަށް ކައުންސިލުން ކުރަމުން އަންނަ މަސައްކަތުގެ ދަށުން ކުރިންވެސް ތާވަލްކުރެވިފައި ވާގޮތަށް ކައުންސިލުން ގޭބިސީތަކުގައި އުފެދޭ ކުނި ނެގުމާއި ކުނިމެނޭޖް ކުރުމުގެ މަސައްކަތް މިއަދުވަނީ ރަސްމީކޮށް ފެށިފައެވެ. މި މަސައްކަތް ފަށާފައިވަނީ މިއަދު ހެނދު 8:00 ގައެވެ.
ކައުންސިލުން ފޯރުކޮށްދޭ މި ޚިދުމަތް މިއަދުން ފެށިގެން މި މަހުގެ 31 ގެ ނިޔަލަށް ރަށުގެ ހުރިހާ ގޭބިސީތަކަށް ހިލޭ ލިބިގެންދާނެއެވެ. އަދި 1 ފެބްރުއަރީ 2022 އިން ފެށިގެން މި ޚިދުމަތް ލިބޭނީ ހަމައެކަނި މި ޚިދުމަތަށް އެދި ރަޖިސްޓްރީވެފައިވާ ގޭބިސީތަކަށެވެ. މި ޕްރޮގްރާމުގެ ދަށުން ރަޖިސްޓްރީކޮށްފައިވާ ގޭބިސީތަކުން ބަދިގެ ޑަސްބިން ކޮންމެ ދުވަހަކު ނެގޭނެއެވެ. އަދި އެހެނިހެން ކުނި ނެގުމަށް ހަމަޖެހިފައިވަނީ ހަފްތާއަކު ތިން ދުވަހުއެވެ. މީގެއިތުރުން ވިޔަފާރިތަކާއި، ހޮޓާ ރެސްޓޯރެންޓް އަދި މުވައްސަސާތަކުން ކޮންމެ ދުވަހަކު ކުނި ނެގުމަށްވަނީ ހަމަޖެހިފައެވެ. މި ޚިދުމަތަށް އެދޭފޯމް ކައުންސިލް އިދާރާއިންނާއި އަދި ކައުންސިލް އިދާރާގެ ވެބްސައިޓުން ލިބެންހުންނާނެއެވެ. މި ޚިދުމަތަށް އެދި ފޯމް ހުށަހެޅުމުގެ ފުރުސަތު 25 ޖަނަވަރީ 2022 އިން ފެށިގެންވަނީ ހުޅުވާލެވިފައެވެ.